सिसडोलमा स्वास्थ्यजन्य फोहोर फाल्ने संस्थालाई ५० हजार जरिवाना

काठमाडौँ । काठमाडौँ महानगरपालिकाले सिसडोल ल्याण्डफिल साइटमा चिकित्साजन्य हानिकारक फोहोर पुर्‍याउनेलाई ५० हजार रुपैयाँ जरिवाना गरेको छ । काठमाडौँ महानगरपालिका वडा नम्बर ५ मा रहेको सुनौलो परिवार नेपालले स्वास्थ्य उपचारका क्रममा प्रयोग गरेका सिरिञ्जलगायत सामान साइटमा पुर्याएको पाइएपछि महानगरले उक्त संस्थालाई ५० हजार रुपैयाँ जरिवाना गरेको हो ।
महानगरले फोहोर व्यवस्थापनसँग सम्बन्धित अनधिकृत क्रियाकलापलाई नजिकबाट निगरानी गरिरहेको वातावरण तथा कृषि विभागका प्रमुख रविनमान श्रेष्ठले बताए । कानुनले बर्जित गरेका फोहोर साइटमा लैजाने जोसुकैलाई पनि कारवाही गरिने उनले बताए । हानिकारक फोहोरलाई उत्पादक आफैँले निर्मलीकरण गरेर सामान्य फोहोरमा बदल्नुपर्ने र त्यसपछि सामान्य प्रक्रियाबाट लैजान सकिने उनको भनाई थियो । उनले भने, ‘यहाँ सामान्य फोहोर मात्र लैजान मिल्छ ।’
अहिले काठमाडौँ उपत्यकाकाको फोहोर बञ्चरे डाँडास्थित साइटमा व्यवस्थापन भइरहेको छ ।